Ghalib-Dil-E-Naadaa.N

dil-e-naadaa.N tujhe huaa kyaa hai
aaKhir is dard kii davaa kyaa hai

Naadaan: Ignorant, unlearned;

ham hai.n mushtaaq aur vo bezaar
yaa ilaahii ye maajaraa kyaa hai

Mushtaaq: Ardent, Eager, Interested, Keen
Bezaar: Angry, Uninterested
Ilaahii: God
Maajraa: Affair, Event, Matter, Ongoing

mai.n bhii muu.Nh me.n zabaan rakhataa huu.N
kaash puuchho ki muddaa kyaa hai

Muddaa: Aim, Topic

jab ki tujh bin nahii.n koii maujuud
phir ye ha.ngaamaa, ai Khudaa kyaa hai

Maujuud: Available, Existing,
Hangaamaa: Affray, Confusion, Disorder, Riot, Ruckus, Tumult, Turmoil, Uproar

ye parii cheharaa log kaise hai.n
Gamzaa-o-ishvaa-o-adaa kyaa hai

Parii: Beautiful Woman, Fairy
Gamzaa: Amorous Glance
Ishvaa: A Confused and Dubious Affair, Amorous,
Adaa: Accomplished, Beauty, Posture
Gamzaa-o-Ishvaa-o-Adaa: Amorous/coquetish posture

shikan-e-zulf-e-ambarii kyo.n hai
nigah-e-chashm-e-surmaa saa kyaa hai

Shikan: Crease, Crack,
Ambarii: Fragrance
Shikan-e-Zulf-e-Ambarii: Tussled but fragrent hair
Nigah-e-Chashm-e-Surmaa: A glance through Kohl decorated eyes

sabzaa-o-gul kahaa.N se aaye hai.n
abr kyaa chiiz hai havaa kyaa hai

Sabzaa: Flora, Greenery
Abr: Cloud

hamako unse vafaa kii hai ummiid
jo nahii.n jaanate vafaa kyaa hai

Wafaa: Fulfilling A Promise,
Ummiid: Anticipation, Chances,

haa.N bhalaa kar teraa bhalaa hogaa
aur darvesh kii sadaa kyaa hai

Darvesh: Beggar, Mendicant
Sadaa: Always, Call,

jaan tum par nisaar karataa huu.N
mai.n nahii.n jaanataa duaa kyaa hai

Nisaar: Throwing, Dispersion, Offer,
Duaa: Blessing, Prayer, Wish

mai.n ne maanaa ki kuchh nahii.n ‘Ghalib’
muft haath aaye to buraa kyaa hai